მალტის რესპუბლიკა

დიპლომატიური ურთიერთობების ქრონოლოგია

დიპლომატიური ურთიერთობები საქართველოსა და მალტის რესპუბლიკას შორის დამყარდა 1993 წლის 1 თებერვალს.

2004 წლიდან, მალტის რესპუბლიკის გადაფარვა ხორციელდება იტალიის რესპუბლიკაში საქართველოს საელჩოს მიერ.

2010-2020 წლებში, საქართველოს გადაფარვა ხორციელდებოდა პოლონეთის რესპუბლიკაში მალტის რესპუბლიკის საელჩოს მიერ, ხოლო 2020 წლიდან საქართველოს გადაფარვა ხორციელდება მალტის რესპუბლიკიდან.

თანამშრომლობის ძირითადი სფეროები

მალტის რესპუბლიკასთან გაფორმებული შეთანხმებები მოიცავს თანამშრომლობას ისეთი მიმართულებებით, როგორიცაა: შემოსავლებსა და კაპიტალზე ორმაგი დაბეგვრის თავიდან აცილებისა და გადასახადების გადაუხდელობის აღკვეთა, დანაშაულის წინააღმდეგ ბრძოლაში თანამშრომლობა, კულტურის, მეცნიერებისა და განათლების სფეროები.

მალტა მხარს უჭერს საქართველოს ტერიტორიულ მთლიანობას და ოკუპირებული რეგიონების არაღიარების პოლიტიკას.

ორ ქვეყანას შორის ორმხრივი ურთიერთობები დადებითი დინამიკით ხასიათდება.  აღმასრულებელი და საკანონმდებლო ხელისუფლების დონეზე ვიზიტებს შორის აღსანიშნავია:

2023 წლის 8-9 მაისს, საქართველოს პარლამენტის თავმჯდომარის, შალვა პაპუაშვილის ვიზიტი მალტაში;

2023 წლის 22 სექტემბერს, გაეროს გენერალური ასამბლეის ფარგლებში საქართველოს პრემიერ-მინისტრის, ირაკლი ღარიბაშვილის შეხვედრა მალტის რესპუბლიკის პრემიერ-მინისტრთან, რობერტ აბელასთან;

2022 წლის 19 ივნისს, ტურინში, ევროსაბჭოს მინისტერიალის ფარგლებში საგარეო საქმეთა მინისტრების, ილია დარჩიაშვილის და იან ბორგის შეხვედრა.

მალტის უნივერსიტეტის ხმელთაშუა ზღვის დიპლომატიურ სწავლებათა აკადემიასთან თანამშრომლობის ფარგლებში, ქართველ დიპლომატებსა და საჯარო მოხელეებს მრავალი წელი სწავლებისა და კვალიფიკაციის ამაღლების საშუალება ეძლეოდათ მალტის დიპლომატიურ აკადემიაში. ასევე, აღსანიშნავია წარმატებული თანამშრომლობა მალტის საერთაშორისო საზღვაო სამართლის ინსტიტუტსა და ქართულ უნივერსიტეტებს შორის საზღვაო სამართლის მიმართულებით, რომლის ფარგლებშიც 2023 წელს, თბილისის სახელმწიფო უნივერსიტეტსა და მალტის საერთაშორისო საზღვაო სამართლის ინსტიტუტს შორის თანამშრომლობის მემორანდუმი გაფორმდა.

2024 წელს მალტის რესპუბლიკა ეუთო-ს თავმჯდომარე ქვეყანაა.